Кошаркарската репрезентација на Македонија доживеа уште еден убедлив пораз на квалификацискиот олимписки турнир во Талин. Домаќинот на турнирот Естонија ја победи Македонија со 83:59 (25:7, 19:15, 21:22, 18:15).
Македонија одигра катастрофална прва четвртина, по која Естонија стекна капитална предност од 18 поени. До крајот Естонија рутински ја сочува предноста.
Војдан Стојановски со 12 и Ти-Џеј Шортс со 11 поени беа единствените довцифрени во редовите на македонската репрезентација.
Естонија ја предводеа Треиер со 14, односно Дрел и Рајесте со по 12 поени.
Претходно во оваа група Израел со 80:67 ја победи Чешка. Во понеделник Израел и Естонија ќе се борат за првото место во групата, но јасно е дека и двете селекции ќе продолжат во полуфиналната фаза која се игра во Гливице, Полска.
Македонија против Чешка ќе игра за престиж, во понеделник од 15 часот.