Кениецот Еванс Кипкемои Бивот е победник на 14-тото издание на Скопскиот маратон, кој во неделата го „придвижи“ Скопје со учество на над 10.000 спортисти во маратонската трка, полумаратонот и пократките трки.
Бивот стигна до својата четврта маратонска победа во кариерата откако постави време од 2:14:08, победувајќи уште еден Кениец, Џон Лангат за 51 секунда. Хосеа Кипротич со 2:28:58 го комплетираше кенискиот подиум во Скопје.
Најдобар домашен маратонец беше Александар Кираџиев со петтото место со време од 2:42:48.
Во полумаратонската трка, Дарио Ивановски стигна до импресивна победа, покажувајќи дека е еден од нашите најдобри тркачи на долги патеки. По 21 километар, Ивановски имаше победа со време од 1:09:10, пред Атанас Анчевски и Милош Ранчиќ.
Трката на 5 километри беше најмасовна, но само 6 луѓе ја имаа можноста да ги освојат првите 3 места во категоријата мажи и категоријата жени. Кај машките натпреварувачи први беа Богдан Цветковски, Кристијан Стојани, Леонид Вандевски, а кај жените Греса Бакрачи, Марго Бојаџиева, Викторија Ѓорѓеска.