Европскиот суд за човекови права пресуди во корист на 32-годишната атлетичарка Кастер Семенја, велејќи дека швајцарските судови треба да и дадат нова шанса да се бори против барањата спортистите со висок природен тестостерон да земаат лекови за да го намалат.
Двократнaтa олимпискa шампионка од Јужна Африка на 800 метри се обрати до Европскиот суд за човекови права во февруари 2021 година, откако ги загуби жалбите пред CAS, највисокиот спортски суд и Швајцарскиот Федерален суд (СФТ) во долготрајна правна битка.
Европскиот суд за човекови права одлучи, со тенко мнозинство од четири гласа „за“, дека првичната жалба на Семења против прописите за Светската атлетика не била соодветно слушната.
„Судот конкретно утврди дека на апликантката не и била обезбедена доволна институционална и процедурална заштита во Швајцарија, што би ѝ овозможило ефективно да ги испита нејзините жалби“, се вели во судското соопштение. „Високиот влог во случајот за апликантот и тесната маргина на дискреција дозволена на тужената држава требаше да доведат до темелна институционална и процедурална проверка, но апликантот не можеше да добие таков преглед“.
Семенја сега би можела уште еднаш да ги оспори правилата што ја ставија нејзината кариера во мирување. Таа има медицинска состојба позната како хиперандрогенизам, која се карактеризира со повисоко од нормалното ниво на тестостерон, хормон кој ја зголемува мускулната маса, силата и хемоглобинот, што влијае на издржливоста.
Светската атлетика соопшти дека се држи до своите правила, кои ќе останат на сила засега.
„Ние остануваме на ставот дека прописите на ДСД се неопходни, разумни и пропорционални средства за заштита на фер конкуренцијата во женската категорија, како што е утврдено и од Судот за спортска арбитража и од Федералниот суд на Швајцарија, по детална и стручна евалуација на доказите“, истакнаа од Светската атлетска федерација.
Судот за спортска арбитража во 2019 година пресуди дека правилата на глобалното раководно тело се неопходни за фер женско натпреварување.