Новак Ѓоковиќ во сабота во Торино не пред 21 часот се очекува да се соочи со Карлос Алкараз во полуфиналето на Завршниот Мастерс. Во второто полуфинале не пред 14 часот и 30 минути ќе играат Јаник Синер и Данил Медведев и со право може да се каже дека се најдобрите тенисери во 2023 година.
Такво мислење изрази и Патрик Мекинро, кој на Твитер ги откри своите фаворити за полуфиналето.
„Очигледно ова се четворицата најдобри играчи во 2023 година. Го очекувам финалето меѓу Ѓоковиќ и Синер“, напиша Мекинро.
Патрик Мекинро порано беше добар дубл играч, а подоцна и тренер, а брат му е и на легендарниот Џон Мекинро.
Синер го совлада Новак со 2:1 во групната фаза по драмата во последниот тај-брејк и би имал нова тешка задача во потенцијалното меѓусебно финале.