Јаник Ноа, селекторот на француската машка и женска репрезентација во тенис, не е сигурен дека Ролан Гарос воопшто ќе се одржи оваа година.
Челниците на вториот Гренд слем во сезоната решија да го одложат турнирот поради коронавирусот. Според нивниот план Ролан Гарос ќе се одржи на 20 септември, една недела по завршувањето на Ју-Ес опен.
Оваа одлука на организаторите на Роланд Гарос наиде на многу критики во светот. Селекторот на Франција не верува дека турнирот ќе се одржи оваа година.
„Во Париз вложуваат напори турнирот да биде одржан. Доколку го откажат ќе доживеат економска катастрофа. Јас мислам дека турнирот е мртов, нема да има услови да се одржи“, рекол Ноа.
Целата сезона во тенисот е под знак прашалник за оваа година. Прашање е кога работите ќе се нормализираат, односно кога мечевите ќе можат да се играат пред публика, бидејќи доколку нема публика тенисот не може да го оствари зацртаниот профит.