И покрај тоа што е повеќе од јасно дека повеќе нема да се сретнат во октагонот, „лошата крв“ меѓу УФЦ ривалите Хабиб Нурмагомедов и Конор Мекгрегор продолжува, откако Ирецот повторно имаше невкусен обид за навреда на Дагестанецот споменувајќи го неговиот починат татко.
Во низа на објави на Твитер, кои подоцна беа избришани, Мекгрегор му одговори на Хабиб за неговиот коментар по поразот на Мекгрегор од Дастин Поаире овој месец. Тогаш, Хабиб напиша дека „доброто секогаш го победува злото“, пресреќен од победата на Поаире, која дојде по скршеницата на ногата на Ирецот.
Јасно лут, Мекгрегор праша: „Значи, КОВИД е добар, а таткото е лош?“, посочувајќи кон менторот и таткото на Хабиб, Абдулманап Нурмагомедов, кој почина од инфекција со КОВИД-19 минатата година. На ова одговори менаџерот на Хабиб, Али Абделазиз, порачувајќи му на Мекгрегор да не се грижи и дека неговото време ќе дојде, на што Конор одговори: „Не пред твоето“.
