Френсис Тијафоу и Тејлор Фриц ќе се борат за честа да станат првиот американски шампион на Јапонскиот опен во Токио по Пит Сампрас во далечната 1996 година.
Тијафоу со 6:2/0:6/6:4 го совлада Кореецот Квон Сун-Ву, откако Фриц исто така во три сета, со 6:3/6:7(5)/6:3 беше подобар од Канаѓанецот Денис Шаповалов. Тијафоу, светскиот рекет број 19 кој го шокираше Рафаел Надал за пласман во полуфиналето на САД опен ќе игра за својата втора АТП титула по таа од Делреј Бич во 2018 година.
Тој додава дека ќе биде фантастично да се игра со Фриц во финалето, откако станале добри пријатели по настапите на Лејвер купот, каде што Светот ја победи Европа во драматична пресметка во последниот турнир во кариерата на Роџер Федерер.
„Го сакам тоа момче. Вистински фајтер, знае да сервира и има силен форхенд. Мислам дека ќе биде и уште подобар. Подобриот човек нека победи“, вели 24-годишниот Тијафоу.