Вардар доживеа тесен пораз од Лајпциг од 27:26 (11:8) во борбата за третото место на Хајде купот во Германија, завршувајќи го турнирот со една победа (над Фуксе Берлин) и два порази (од Лајпциг и Хамбург).
„Црвено-црните“ беа рамноправен противник во текот на целото прво полувреме, пред во финишот германскиот клуб да направи предност од три гола. Лајпциг почна посигурно и во второто полувреме, во кое стигна и до шест гола разлика (16:10), пред Вардар да се доближи, но без сили за целосен пресврт.
Тимур Дибиров повторно беше најдобар во нападот со осум постигнати голови, додека по четири имаа Борозан и Скубе.
Ова беше прв тест на „новиот“ Вардар под водство на новиот тренер Гарсија Парондо и без поголем дел од ѕвездите кои последните сезони го предводеа македонскиот шампион.