Шпанската ракометна репрезентација го потврди својот пласман во полуфиналето на Европското првенство, откако рутински со 37:28 ја совлада репрезентацијата на Белорусија, за да осигура место од групата 1 покрај Хрватска, со која ќе имаат директен дуел за првото место и за „бирање“ на противникот.
На Шпанците им требаше само да не загубат со повеќе од шест голови од Белорусите, во што беше тешко да се верува, но барем во првото полувреме имаше рамноправен ракомет и „фуријата“ имаше само гол предност (17:16). Меѓутоа, во средината на второто полувреме работите дојдоа на своето место и со импресивна серија, Шпанците направија предност од осум гола (32:24), за на крај рутински да го доведат до крај.
Феран Соле и Анхел Фернандез постигнаа по седум гола за Шпанците, за кои блескаше и Гонзало де Варгас на голот, додека кај Белорусија најефикасен беше Микита Ваилупау со осум гола.
Со ова дефинитивно се става крај на математичките шанси Германија да обезбеди полуфинале, и сега им следува вечерниот „ревијален“ меч против соседите Австрија. Шпанија, пак, се подготвува за пресметката со Хрватите во среда.
ЕВРОПСКО ПРВЕНСТВО ВО РАКОМЕТ
ГРУПА 1
Хрватска – Чешка 22:21 (11:9)
Белорусија – Шпанија 28:37 (16:17)
Австрија – Германија 20.15 ч.
Табела: 1.Шпанија 8, 2.Хрватска 8, 3.Германија 2, 4.Австрија 2, 5.Белорусија 2, 6.Чешка 0
Watch the Game Highlights from Belarus vs. Spain, 01/20/2020 pic.twitter.com/feW21P2cge
— EHF EURO (@EHFEURO) January 20, 2020