Поранешниот европски шампион Вардар немаше многу среќа во ждрепката за новата сезона во Лигата на шампионите, откако ја доби далеку потешката група А полна со европски гиганти.

По ждрепката на ЕХФ, Вардар се најде во групата А со актуелниот европски шампион Монпелје, Барселона, Веспрем, Кјелце, Рајн Некар Левен, Кристијанштад и Мешков Брест. Со ова, Вардар ќе има многу тешка задача да го повтори успехот од последните две сезони кога завршуваше како првопласиран во својата група и добиваше директен пласман во четврт-финалето.

Во групата Б се француските фаворити Пари Сен-Жермен, Нант, Пик Сегед, Флензбург, ППД Загреб, Целје, Скјерн и Мотор Запорожје.

Вице-шампионот Металург се наоѓа во групата Ц со тимовите на Силкеборг, Спортинг Лисабон, Бешикташ, и старите познаници Чеховски Медведи и Татран Прешов.