Манчестер јунајтед се пласираше во четврт-финалето на ФА купот, откако на гостувањето кај Дерби Каунти стигнаа до рутинска 0:3 победа предводени од нигерискиот напаѓач Одион Игало, кој постигна два гола за дуел со Норич во следната фаза.
Мечот на полниот „Прајд парк“ беше значителен поради тоа што третпат во кариерата рекордниот стрелец на „ѓаволите“, Вејн Руни играше против нив, но на крајот второлигашот не успеа да направи подвиг.
Лук Шо го отвори резултатот во 33. минута со убав лоб-гол, по што на сцена стапи Игало, фудбалерот кој Јунајтед го донесоа во последниот ден од преодниот рок како итна замена за повредениот Маркус Рашфорд, со гол во 41. минута. Игало стрелаше и во 70. минута за да се комплетира задоволителната победа за тимот на Оле Гунар Солскјер.