Гонзало Игуаин ќе стане најплатениот фудбалер во американската МЛС лига кога ќе се договори со клубот на Дејвид Бекам, Интер Мајами, тврди американскиот весник „Мајами хералд“.
Аргентинскиот напаѓач веќе доби 3 милиони евра од Јувентус за да се раскине неговиот договор една година предвреме, а сега во Интер од Флорида тој ќе заработува основна плата од 7 милиони долари, за половина милион долари повеќе од парите кои Бекам ги добиваше во петте сезони во Лос Анџелес галакси.
32-годишниот ветеран ќе потпише двеиполгодишен договор со најновиот МЛС тим и ќе биде поблиску до својот брат Федерико, кој веќе осум години игра во МЛС во тимовите на Колумбус кру и Ди Си јунајтед. Иако договорот не е официјализиран, ко-сопственикот на „Херонс“, Хорхе Мас веќе се фотографираше со Игуаин пречекувајќи го на аеродромот во Мајами.