Како што се приближува почетокот на Светското првенство во Катар, се кристализираат многу категории и статистички параметри. Откако селекторите ги објавија списоците на фудбалери на кои сметаат, беше објавено и кои клубови даваат најмногу фудбалери на овој Мундијал. Во Топ 5 има и мало изненадување.
Најмногу претставници ќе има Баерн Минхен, вкупно 17, додека Барселона ќе има 16 фудбалери, колку и Манчестер Сити.
Ал Сад со 15 репрезентативци е на четвртото место, што е изненадувачки. Секако дека најголемиот дел од катарските репрезентативци настапуваат за катарскиот клуб, но не се очекуваше дека вака ќе биде претставен еден од најтрофејните клубови во Катар.
Манчестер Јунајтед го затвора Топ 5 со 14 фудбалери, додека Реал Мадрид е на шестото место и на претстојното Светско првенство ќе има 13 фудбалери.
Во Топ 10 клубовите со најмногу репрезентативци се и Ал Хилал (12), Челси (12), додека десеттото место го делат шест клубови со по 11 репрезентативци и тоа Ајакс, Атлетико Мадрид, Борусија Дортмунд, Јувентус, ПСЖ и Тотенхем.
Што се однесува до клубовите од регионот, Динамо Загреб обезбедува пет репрезентативци, а Црвена звезда – тројца.