Англискиот премиерлигаш Ливерпул на лето ќе тргне во шопинг во Холандија. Цел на „црвените“ се двајца фудбалери на холандскиот шампион Ајакс.
Според „Скај Германија“, Ливерпул е заинтересиран за централниот дефанзивец, Јуриен Тимбер, и за играчот за врска на Ајакс, Едсон Алварез. Двајцата се столбови во играта на гигантот од Амстердам во последните неколку сезони.
Тимбер на 109 натпревари за Ајакс досега има осум гола и шест асистенции. 21-годишниот одбранбен фудбалер беше стартер и на сите натпревари на „лалињата“ на Светското првенство во Катар кон крајот на минатата година. Неговата примарна позиција е централен дефанзивец, но може да се користи и како бек кога е потребно. Неговата вредност во моментот е околу 45 милиони евра.
Мексиканецот Едсон Алварез има два гола и две асистенции за тимот оваа сезона. 25-годишниот фудбалер одиграше и два натпревари за селекцијата на Мексико на Светското првенство. Неговата вредност се проценува на 35 милиони евра.