Тренерот на Рома, Жозе Мурињо остана разочаран по поразот од Наполи (0:1) на „Олимпико“. Натпреварот беше тактичко надмудрување меѓу него и Лучијано Спалети со малку шанси пред двата гола, а „специјалниот“ смета дека „наполитанците“ не заслужиле да си заминат со трите бода.
„Одигравме доволно добро за да не загубиме. Сакавме да победиме, но не како што го направија тоа – неколку шутеви, гол, и тоа е тоа. Беше тежок натпревар. Тие погодија од единствената сериозна можност во второто полувреме. Да не беа жолтите картони, Кристанте можеше да направи фаул и да го прекине контранападот. Морав да стартувам со Рик Карсдорп, кој не беше подготвен за 90 минути, а Пелегрини почувствува проблем со мускулот и побара да биде заменет. Го задржав на теренот колку што можев. Повреден е и Немања Матиќ, па нашите проблеми почнаа по 70. минута. Чувствувам неправда бидејќи моите играчи дадоа се од себе и не заслужија да загубат. Беше јасно дека кој и да даде гол ќе го добие натпреварот“, изјави Мурињо.
Наполи ја чува лидерската позиција во Серија А, додека Рома е на петтата позиција и заостанува седум бода.