Наследниците на Диего Марадона ќе поднесат тужба за да се обидат да ја запрат аукцијата на „Златната топка“, која легендарниот аргентински фудбалер ја доби на Светското првенство во Мексико во 1986 година, изјави денеска нивниот адвокат.
Овој трофеј беше изгубен со децении, но неодамна се појави и треба да се најде на аукција во Париз во јуни, објави минатата недела аукциската куќа Агит.
Марадона, кој почина во 2020 година на 60-годишна возраст, ја освои „Златната топка“, трофејот за најдобар играч на Светското првенство, во 1986 година бидејќи ја предводеше Аргентина до победата над Западна Германија со 3-2 во финалето во Мексико Сити. .
На тој турнир постигна нерегуларен, но сепак признат гол со рака („Божја рака“), како и „Гол на векот“ кога со соло акција ги мина англиските фудбалери.
Наследниците на Марадона велат дека трофејот е украден и тврдат дека сегашниот сопственик нема право да го продаде.
Адвокатот Жил Мор изјави за АП дека ќе поднесе итно барање до претседателот на судот во Нантер (близу Париз) за повлекување на „Златната топка“ од аукцијата. Тој изјави дека ќе побара и судско одземање на трофејот и ќе поднесе пријава за кражба.
Марадона го доби тој трофеј на церемонија во кабарето Лидо на Шанзелизе во 1986 година. Трофејот подоцна исчезна и за него кружеа разни гласини.
Некои рекоа дека Марадона го изгубил во покер или дека го продал за да ги исплати долговите, соопшти аукциската куќа.
Се шпекулираше и дека Марадона го чувал во банка во Неапол, која била ограбена од локални гангстери во 1989 година, кога тој играл за Наполи.
Наследниците на Марадона веруваат дека е украден од банка.
Адвокатот Мор, кој застапува две од ќерките на Марадона, рече дека наследниците дури неодамна дознале дека трофејот бил украден. Според адвокатите, семејството на Марадона сака да се забрани продажбата бидејќи веруваат дека „Златната топка“ му припаѓа на семејството.
Аргументот на аукциската куќа е дека тој што го купил трофејот пред многу години не знаел дека е украден.
Од Агит, на објавувањето на аукцијата објави дека очекува трофејот „да донесе милиони поради неговата уникатност“, изјави за АП дека се извршени сите потребни проверки кај француските и италијанските власти.
„Резултатот е дека до денес нема докази за оспорување на добрата волја и сопственоста на нашиот продавач“, додаваат од аукциската куќа.
Продажбата е закажана за 6 јуни, а купувачите за учество на лицитацијата ќе треба да уплатат 150.000 евра.