Хрватскиот репрезентативец, Матео Ковачиќ, ја освои третата титула во Лигата на шампионите со Реал, иако во финалните натпревари нема одиграно ниту една минута.

Ковачиќ, синоќа во Киев, победата на Реал над Ливерпул (3:1) ја гледаше од клупата за резервни фудбалери.

Играчот од средниот ред, во 2016 година, кога Реал на пенали го победи Атлетико, не беше во протоколот, односно дуелот го следеше од трибините на „Сан Сиро“ во Милано, додека лани во Кардиф беше на клупата за резерви.

„Кога дојдов во Реал мислев дека е многу тешко да се освои титулата во Лигата на шампионите. Овде научив дека тоа е нормална работа. Едноставно клубот живее за ова натпреварување“, рекол Ковачиќ.

Матео Ковачиќ во Реал е од 2015 година, кога Рафа Бенитез го донесе од Интер. За Реал има одиграно 109 натпревари на кои постигнал три гола.