Симона Халеп, романската тениска суперѕвезда во отворено интервју за „Гардијан“ зборуваше за тоа што значи тенисот за неа и што сѐ жртвувала за да стигне до првото место на ВТА листата и да стане гренд слем шампионка.
Таа на 18 години реши да оди на операција за намалување на градите, бидејќи големите гради и пречеа во тенисот. Дали била исплашена?
„Не, моето семејство беше исплашено, но јас не. Не се плашев бидејќи знаев дека морам да го направам тоа за тенисот. Сонот беше да бидам најдобра и се смеев додека одев на лекар. Потоа бев многу полесна и веќе ги немаше проблемите со грбот. Тоа беше најдобрата одлука која можев да ја направам. Бев посветена 100 отсто на тенисот и направив сѐ за тенисот“, вели Романката.
