Рафаел Надал првпат во кариерата одбрани титула од хардкорт турнирите, демолирајќи го Данил Медведев со 6:3/6:0 за да го освои трофејот од Роџерс купот во Монтреал, негов 35. Мастерс 1000 триумф, со што се одвои на вечната листа пред Новак Ѓоковиќ, кој има 33 титули од елитните АТП турнири.
„Беше важно да се стартува добро, бидејќи Данил играше одлично во последно време. Одиграв солидно, можеби најдобро оваа недела“, вели Надал откако Медведев загуби второ финале во низа по поразот од Ник Кирјос во Вашингтон минатата недела.
Надал имаше само три хардкорт мечеви пред турнирот, но го „суреди“ Медведев за само 70 минути правејќи четири брејка. Само неколку часа подоцна, тој потврди дека се повлекува од Мастерсот во Синсинати, каде што беше втор носител зад Ѓоковиќ, но пред Роџер Федерер.
„Има само една причина – морам да внимавам на моето тело и да останам здрав како што се чувствувам сега“, вели Надал.