Рафаел Надал потврди дека нема да настапи на Вимблдон и на Олимписките игри во Токио. Шпанецот, денес го потврди она што го најави, по елиминацијата од Новак Ѓоковиќ, во полу-финалето на Ролан Гарос.
„Здраво на сите, решив оваа година да не учествувам на Вилблдон и на Олимписките игри. Никогаш не е лесно да се донесе ваква одлука, но откако го „слушнав“ своето тело и разговарав со мојот тим, ми стана јасно дека донесов вистинска одлука“, напишал Надал на социјалните мрежи и дополнил.
„Целта е да ја продолжам својата кариера и да продолжам да го работам она што ме прави среќен, а тоа е да се натпреварувам и да се борам за личните и професионалните цели“.
Паузата од само две недели помеѓу Ролан Гарос и Вимблдон, најмногу влијаела врз одлуката на Надал да се откаже од неофицијалното светско првенство во тенис.
Надал во кариерата има две титули на Вилблдон (2008, 2010), има златен медал во сингл на ОИ во 2008 година, а со Марк Лопез има златен медал во дубл на ОИ во 2016 година.