Повеќекратниот олимписки шампион, американскиот пливач Калеб Дресел, не успеа да избори пласман во националниот тим на претстојното Светско првенство во Фукуока.
Дресел не успеа да се квалификува за А финалето во две дисциплини, вклучувајќи го и денешниот квалификациски натпревар на 50 метри слободно, бидејќи заврши на 22. место за 22,72 секунди. Тој беше за 1,07 секунди побавен од Рајан Хелд, кој беше најбрз во квалификациите.
Тоа беше прво натпреварување за 26-годишниот Дресел откако минатото лето ненадејно го напушти спортот.
„Тој е среќен, тој е среќен што плива за првпат по долго време. Знаете дека среќниот спортист е брз спортист. Очигледно тој сè уште не е брз, но со оглед на околностите во кои се наоѓа, тој се подобрува”, изјави неговиот тренер Ентони Нести.
На Олимписките Игри во Токио, Дресел освои златни медали во две штафети на 4 x 100 метри слободно и мешано, 100 метри пеперутка, 50 метри и 100 метри слободно, додека на Игрите во Рио де Жанеиро во 2016 година освои две злата во две штафети 4 x 100 метри слободно и мешано.
Дресел стана првиот пливач по сонародникот Мајкл Фелпс кој освоил седум златни медали на Светското првенство во Будимпешта во 2017 година, а две години подоцна освои шест златни и два сребрени медали на Светското првенство во Гуангжу.
Дресел се врати во базените на крајот на февруари оваа година.
Светското првенство ќе се одржи во Фукуока од 14 до 30 јули.